سەکۆی ئازادی هەولێر

 مەزنایەتی بە ناو

سەنتەری ڕۆشنبیری بارزان هەڵدەستێ بە چالاکییەک بەناوی ڤیستیڤاڵی دایک لە بارزان، یوسف حەسکۆ تەعینکراوێکی بەرپرسی ئەم سەنتەرەییە لە لایەن وەزارەتی ڕۆشنبیری. لەسەر ئەم چالاکییە لە بەرنامەی بەیانی باشی ئەمڕۆی کوردستان تێڤێ چاوپێکەوتنێکی درێژی لەگەڵ کرا ئەمڕۆ، قەرارە پەرلەمانە دەست بەتاڵەکەی کوردستان بە فەوری پاکێتە قەرارێکی بۆ دەرکا، تا لە بەرواری ٢/٥ ڕەشماڵی ڕەوەندی دایکان لە بناری چیای پیرانی مێرگەسۆر هەڵدەنوو دەست بە ئیحتیفالاتی خۆیان بکەن. .

لێرەدا نە حەسکۆ نە سەنتەرەکەی شتێکی هێندە سرنجڕاکێش نییە، بەشی زۆری خەلک ئاگاداری باری هەڵسوڕانی کەسوو ڕێکخراوە کارتۆنییەکانی حاشییەی حیزبە ڕەهاخوازوو نادیموکراتەکانی ئەمڕۆی کوردستانە، بەدەردی حاجی قادری کۆیی گوتەنی. باش نەماوە گەر باشت دەوێ ، وەرە سەتت پێ نیشاندەم گەر قورمساغت دەوێ.

ئەوەی کە سرنج ڕاکێشە ئەو کەرستانەییە کە بۆ فریودانوو بەردەست خستنی بیرۆکەی دیکتاتۆرییەتی بنەماڵەییە بۆ بەردەم ڕای گشتی خەلک.

بەکارهێنانی هەندێ وشەو زاراوە عاتیفی، فوپێداکردنی بالۆنی مێدیایی یەکێکە لەم میتۆدانەی کە ڕۆژانە دووبارە دەبێتەوەو بەرگوێمان دەکەوێ، بۆ نموونە، باوک، یاخود بابێ مەزن، یا باوکی ڕۆحی، یا تیمسالێت بابێ مەزن. یاخود بەکارهێنانی ناوی دایک، وەک دایکا هەرە مەزن، گەورە ژنا کورد، دایکا کوردا، دایکا هەموو هۆزوو عەشرەتوو ولات، دیارە شوێنوو شاروو ئارامگاکانیش مەزنێتیوو بالابوونیان لەم بالۆنە مێدیاییانەدا پێ دەدرێ.

دیارە بەم فۆڕمە قەبانە، بەم ناوە فوتێکراوانە، کەرستەکانی هەڵنانی دیکتاتۆرییەت بێڕێزی بە زۆربەی هەرەزۆری دایکانوو باوکانی کوردستان دەکات، لەحاڵێکدا خودی ئەم زاراوەیە خەسڵەتێکی بایەلۆجی نەوەلێکەوتنەوەو بەرپرسیارییەتیی دەگەیەنێ، کەچی لەم ناوەندە مێدیاییەدا پۆلینکراوە بەگوێرەی ئامانجێکی دوور لە باری ئاسایی ئینسانی و هاوتایی، دوور لە بەها بایۆلۆجی و پەروەردەیی و کلتوری، دەستبژێرێ لە باوانە بەختیارەکان،  لەگەمەییەکی مەلیکانەو عەشایەرانەدا تەوزیف دەکرێن. لە ڕواڵەتا مەبەستەتە جوان میکیاج کراوە،بەلام لە ناوەرۆکا تەقەلایەکە بۆ تێپەڕاندنی واتایەک بۆ ناو مێشک، بۆ گۆشکردنی کۆمەلانی خەلک بە باوەڕی ناوە مەزنوو ناوەرۆک پووچەکان. هەوڵی بلاوکردنەوی عەقلییەتێکی ئۆجاخزەدەییە، دەیەوێ شانوو سەری هەمووانی بۆ قۆت کرابێ، تا بازی بەختی شاهانەی لەسەر بنیشێ، مەزنایەتی ناوی هەندێ، پیرۆزی مەزاری هەرە پاکی شوێنێ، ڤیستیڤاڵی عەشرەتی هەرە گەورەی دێیەک، هەتادوایی. هەمووی دەبێتە کەرستەوو ئامرازێکی قوڵکردنەوی کەلەنی ناو کۆمەڵگە، بۆ مەبەستی خەسڵەت پێدانێکی  ساختەو ناڕاست، شۆڕکردنەوەی مۆدێلێ بۆ ناو کۆمەلانی خەلک، دنەدانیان بە ئاڕاستەی لوتبەرزی و خۆپەسندی زێدەڕەوانە هەندێ لەسەر زۆبە. ئەوانەی کە دەبنە کەرستەی ئەم مێدیا عەشایەرییە دواکەوتوانەییە، دەخرێنە ناو گەمەییەکی پڕ لە شەرمەزاری کاتێ ڕووبەڕوو دەخرێنەوە لەگەڵ بەشە ئاساییەکەی کۆمەڵگە.

هەڤاڵ سەید حەسەن